Ma’lum qilinishicha, mazkur tashkilot biznes va davlat o‘rtasida samarali muloqot platformasini shakllantirishga ixtisoslashgan. U yirik kompaniyalar manfaatlaridan kelib chiqib, davlat siyosatiga biznesni integratsiya qilish hamda hududiy iqtisodiy strategiyalarni ishlab chiqishda faol ishtirok etib keladi.

Uchrashuvda turizm, logistika, transport va infratuzilma sohalarida hamkorlikni rivojlantirishga alohida e’tibor qaratildi. Xususan, zamonaviy yo‘llar infratuzilmasini takomillashtirish, “yashil” va texnologik transport yechimlarini joriy etish bo‘yicha tajriba almashish masalalari muhokama qilindi. Shuningdek, startap ekotizimini rivojlantirish, investorlar uchun jozibador muhit yaratish, yangi ish o‘rinlari tashkil etish va innovatsiyalarni qo‘llab-quvvatlash yo‘nalishlarida ham o‘zaro hamkorlik imkoniyatlari ko‘rib chiqildi.

Muloqot yakunida tomonlar hamkorlikning ustuvor yo‘nalishlari, kelgusida amalga oshiriladigan aniq vazifalarni belgilab oldilar.