Natijada o‘zaro savdo aloqalari ham kengayib, 2025-yil yakunlariga ko‘ra Samarqand viloyati va AQSh o‘rtasidagi tovar aylanmasi 15 million dollarga yetgani ma’lum qilindi. Bugungi kunda viloyatdan Amerika bozoriga mayiz, quritilgan meva-sabzavotlar, gilam va gilam mahsulotlari, konserva, ichimliklar hamda qalampir kabi mahsulotlar eksport qilinmoqda.

Muzokaralar chog‘ida istiqboldagi hamkorlik yo‘nalishlari ham muhokama qilindi. Xususan, Missuri shtati qonunchilik va biznes doiralari delegatsiyasining Samarqand viloyatiga tashrifini tashkil etish, oliy ta’lim muassasalari o‘rtasida hamkorlikni rivojlantirish, shuningdek qishloq xo‘jaligi, oziq-ovqat sanoati, logistika, IT va turizm sohalarida qo‘shma loyihalarni kengaytirish bo‘yicha takliflar ilgari surildi.

Uchrashuvdan so‘ng Adiz Boboyev Missuri shtati Bosh assambleyasi majlisida Vakillar palatasi deputatlari hamda senatorlarga tanishtirildi. Bu esa o‘z navbatida ikki hudud o‘rtasidagi siyosiy va iqtisodiy aloqalarni mustahkamlashda muhim ahamiyatga ega.