O‘zbekiston va xorijiy ilmiy muassasalar vakillari ishtirok etgan ushbu xalqaro anjuman ochilishida Samarqand viloyati hokimi vazifasini bajaruvchi Adiz Boboyev, O‘zbekiston Respublikasi Prezidenti Administratsiyasi Kreativ iqtisodiyot va turizm masalalari departamenti direktori o‘rinbosari Elmurod Najimov va YUNESKOning Butunjahon merosi markazi direktori Lazare Eloundou Assomo so‘zga chiqib, konferensiya ishiga muvaffaqiyat tiladilar.

Anjumanda Samarqandning boy tarixiy-ma’naviy va madaniy merosi har tomonlama tahlil qilinib, arxeologik va tarixiy tadqiqotlar natijalari taqdim etildi.

Konferensiyada Samarqand Sharq va Gʻarb tamadduni kesishgan, fan, hunarmandchilik, savdo va me’morchilik rivojlangan, ma’naviyat va madaniyat markazi bo‘lib kelganligi alohida ta’kidlandi. Mutaxassislar bu yerda olib borilgan tadqiqotlar shahar hududidagi ilk aholi manzilgohlari miloddan avvalgi II ming yillikka borib taqalishini ko‘rsatayotganini ta’kidlashdi.

Arxeologik qazishmalar jarayonida Samarqanddagi Ko‘ktepa, Afrosiyob va boshqa yodgorliklarda qadimgi shahar madaniyatiga oid turli arxitektura inshootlari, xo‘jalik va diniy binolar, moddiy madaniyat namunalari aniqlangani xususida maʼruzalar qilindi. Bu topilmalar Samarqand va uning vohasida shahar sivilizatsiyasi uzluksiz rivojlanganini ko‘rsatadi,-dedi olimlar.

Muhokamalar davomida Afrosiyob va Ko‘ktepa kabi arxeologik yodgorliklarda xalqaro hamkorlik doirasida olib borilgan tadqiqotlar natijalari ko‘rib chiqilib, Samarqandning yoshi uch ming yildan kam emas degan xulosaga kelindi.