Uchrashuv avvalida Ahmad Muzani viloyat hokimi Adiz Boboyev boshchiligidagi viloyat delegatsiyasining Indoneziyaga tashrifi davomida bergan taklifi asosida Samarqandga kelganini alohida taʼkidlab o‘tdi.

Muloqot chog‘ida o‘zaro manfaatli hamkorlikni yanada rivojlantirish, xususan, ziyorat turizmi yo‘nalishida aloqalarni kengaytirish masalalari atroflicha muhokama qilindi. Tomonlar indoneziyalik ziyoratchilarning Samarqandga safarlarini, ayniqsa, Imom Buxoriy majmuasiga tashriflarini yanada samarali tashkil etish, bu borada tajriba almashish va hamkorlikni mustahkamlash yuzasidan fikr almashdilar.

Uchrashuvdan so‘ng Indoneziyadan kelgan diniy ulamolar bilan muloqot qilindi. Unda indoneziyalik ziyoratchilar uchun yaratilayoygan sharoitlar haqida so‘z yuritildi.

Tashrif dasturi doirasida delegatsiya a’zolari Imom Buxoriy xalqaro ilmiy-tadqiqot markazida viloyatning diniy ulamolari bilan uchrashuv o‘tkazadilar. Shuningdek, mehmonlar Imom Buxoriy majmuasini ziyorat qilib, ushbu hududda faoliyat yuritayotgan “Hotel Kampoeng Indonesia – Samarkand” mehmonxonasida bo‘ladilar.

Bundan tashqari, mehmonlar Samarqand viloyatining sanoat va investitsiya salohiyati bilan yaqindan tanishish maqsadida “SAG” zavodi, ishlab chiqarish korxonalari hamda meva-sabzavotlarni saralash va qadoqlash obyektlari faoliyati bilan ham tanishadi.