Ўзбекистон-Россия таълим форуми Самарқанддаги олий ўқув юртлари учун ҳам фойдали бўлди.

"Ўзбекистон-Россия таълим форуми"да вилоятимиздаги олий таълим муассасалари раҳбарлари ҳам иштирок этиб, Россиянинг бир қатор етакчи ўқув юртлари билан келишувларга эришди.

Жумладан, Самарқанд давлат университети – Адыгей, Кабардин-Балкар, Ульянов, Нижегород миллий тадқиқотлар университетлари ҳамда Пушкин номидаги рус тили давлат институти билан, Самарқанд иқтисодиёт ва сервис институти – Кубан, Владимир, Тамбов давлат университетлари билан, Самарқанд медицина институти – Москва, Санкт-Петербург, Самара, Қозон, Уфа шаҳарларидаги етакчи медицина академиялари билан кадрлар тайёрлаш бўйича меморандумлар имзолади.

– Шу пайтгача Россия федерациясининг 17 нуфузли олий таълим муассасаси билан кадрлар тайёрлаш билан боғлиқ илмий-амалий алоқаларни ўрнатгандик, – дейди     СамДУ халқаро алоқалар бўлими бошлиғи О.Умаров. – Энди улар қаторига яна бешта университет ва институт қўшилди. Бу етакчи хорижий олий таълим муассасалари билан ҳамкорликда қўшма диплом дастури асосида кадрлар тайёрлаш, профессор-ўқитувчиларимизнинг хорижий таълим марказларида амалиёт ўташи учун имкониятлар эшигини очади. Айниқса, бакалавриатура, магистратура ва  аспирантура таълим йўналишларида эришилган келишувлар малакали кадрлар тайёрлаш, илмий-тадқиқот фаолиятида ўзаро тажриба алмашишда муҳим аҳа­мият касб этади.

Ҳокимлик ахборот хизмати.