13-dekabr kuni Samarqand viloyatidagi “Xalqlar doʻstligi va diniy bagʻrikenglik” muzeyi binosida “Milliy merosga mening hissam” aksiyasi doirasida xarid qilingan ashyolar ko‘rgazmasi bo‘lib o‘tdi.

Ko‘rgazma Madaniy meros agentligi, Samarqand davlat muzey-qo‘riqxonasi tomonidan tashkil etildi.

Ko‘rgazmada, Samarqand davlat muzey-qo‘riqxonasi xodimlari viloyat va respublika bo‘ylab ilmiy ekspeditsiyalari davomida topilgan hamda aholidan xarid qilib olingan bir qator noyob ashyolar namoyish etildi.

Xususan eksponatlar orasidan,

- Payariqdan topilgan saklarning ikki ming yillik bronza qozoni,

- miloddan avvalgi II asr va milodiy XIV asrlarga oid bronza ko‘zgular,

- Qoraxoniylar davriga oid 180 ta kumush tangalar kolleksiyasi,

- Chig‘atoy xonlarining 236 ta dinor va dirhamlari,

- ipak gilamlar, antiqa zargarlik buyumlari, tarixiy liboslar va rasmlar o‘rin olgan.

Ushbu ashyolar kelgusida muzey-qo‘riqxona tasarrufida tashkil etilishi rejalashtirilgan muzeylar ekspozitsiyasini boyitishga xizmat qiladi.