Аҳолига бирламчи тиббий-санитария ёрдамини кўрсатиш, касалликларни профилактика қилиш ва барвақт аниқлаш мақсадида Нуробод туманидаги 12 та олис ва чекка ҳудудларга 14 та махсус контейнерлар ўрнатилди. 

Тумандаги маҳалла фуқаролар йиғинларида “маҳалла тиббий пункт”лари ташкил этиш орқали ҳудудларда истиқомат қилувчи 35 мингдан ортиқ аҳолига тиббий хизмат кўрсатиш янада яхшиланади ва яқинлашади.

Бугун туман сектор раҳбарлари тиббиёт пунктларида ходимлар фаолият юритиши, аҳолига сифатли тиббий хизмат кўрсатиши учун яратилган шарт-шароитлар билан яқиндан танишиб, тиббий хизмат сифатини ошириш, аҳолига янада қулайликлар яратишга қаратилган таклиф ва тавсияларини бериб ўтди.