IX асрда яшаган машҳур мусиқашунос ва шоир. Деҳхудонинг «Луғатнома» китобида келтирилган маълумотларга қараганда, у Самарқанднинг Сўғдидан етишиб чиққан. Арабча аруз вазнида биринчи марта форсча шеър айтган.

Деҳхудо бошқа бир манбага суянган ҳолда араб вазнида биринчи шеър айтган Абу Ҳавс Сўғдий Ҳаким ибн Аҳвас эмас, балки Муҳаммад Васиф Сижизий деган шоирдир, дейди. Мусиқий санъатида ҳам Абу Ҳафс Сўғдий ниҳоятда моҳир бўлган. Абу Наср Форобий ўз китобида у ҳақда маълумот бериб, у шоҳруд номли мусиқа асбобини ихтиро қилганини ёзади. Абу Ҳафс Сўғдийдан кейин бу асбобдан ҳеч ким фойдалана олмаган.