Samarqand shahri hududidan boshlanuvchi yangi temir yo‘l tarmog‘i Jomboy tumanidagi “MAN” zavodi yaqinidan 4R-238 avtomobil yo‘lini kesib, Zarafshon daryosi bo‘ylab o‘tadi va Urgut tumaniga boradi.

Viloyat rahbari tegishli mutasaddilar hamrohligida ana shu tarmoqning Jartepa temir yo‘l bekatigacha bo‘lgan masofasini maxsus poyezda ko‘zdan kechirdi. Shundan so‘ng Jartepa temiryo‘l bekatida yo‘lovchilar uchun yaratilayotgan qulayliklar, vokzal binosi va yuk saroyining qurilishi, Tojikiston Respublikasi hududida logistika markazini tashkil etish borasida amalga oshirilayotgan ishlar muhokama qilindi. Yuk qabul qilish va jo‘natishga mo‘ljallangan yirik shoxobchalarning qurilishida e’tibor qaratilishi lozim bo‘lgan jihatlar haqida to‘xtalib o‘tildi.

- Loyihani amalga oshirish ishlarini yanada tezlashtirish - xalqimizning uzog‘ini yaqin, og‘irini yengil qilishda muhim ahamiyatga ega,- dedi Adiz Boboyev.

Shundan so‘ng Urgut tumanining Do‘stlik MFY hududida barpo etilayotgan avtovokzal, temir yo‘l bekati, tibbiyot klinikasi, ixtisoslashgan maktab hamda ko‘p qavatli turar-joy binolari qurilishi loyihasi doirasidagi ishlarning borishi bilan ham tanishildi. Urgut temir yo‘l vokzali yurtimiz temiryo‘l tarmog‘i tarixida ilk bor xususiy tadbirkor tomonidan qurilayotgan obyekt hisoblanadi.

Ushbu obyektlarda yo‘lovchilar va aholi uchun qulay infratuzilmani yaratish, xususan, ularning dam olishlari, ovqatlanishi, turli xizmatlardan foydalanishlarini hisobga olgan holda qurilish ishlarini amalga oshirish zarurligi ta’kidlandi.

Hududda milliy uslubdagi xizmatlar ko‘rsatish shaxobchalari faoliyatini tashkil etish bo‘yicha ham takliflar berildi. Bu ishlarni amalga oshirishda avvalo aholi uchun yangi ish o‘rinlari tashkil etish, ularning barqaror daromad manbalariga ega bo‘lishlariga e’tibor qaratish lozimligi ta’kidlanib, mas’ullarga tegishli topshiriqlar berildi.