Beshinchi Toshkent xalqaro investitsiya forumi doirasida Samarqand viloyati hokimi Adiz Boboyev Amerika Qo‘shma Shtatlarining “Cove Capital” kompaniyasi rahbari Pini Atahuz bilan uchrashuv o‘tkazdi.

Unda Pini Atahuz sanoat ishlab chiqarishi va strategik mineral resurslarni o‘zlashtirishdagi tajribasi haqida to‘xtaldi. Tomonlar Samarqanddagi volfram zaxiralarini samarali o‘zlashtirish bilan birga, rudani boyitish, konsentrat ishlab chiqarish hamda yuqori qo‘shilgan qiymatga ega mahsulotlar tayyorlashni o‘z ichiga olgan to‘liq ishlab chiqarish zanjirini yo‘lga qo‘yish masalasini ko‘rib chiqdilar.

Loyiha doirasida geologiya ishlari, litsenziyalash, infratuzilma va energiya ta’minoti masalalarida mahalliy hokimlik tomonidan ko‘mak berilishi ta’kidlandi. Shuningdek, hududda strategik mineral resurslarni qayta ishlashga ixtisoslashgan sanoat klasterini tashkil etish imkoniyatlari ham muhokama qilindi.

Uchrashuv yakunida ushbu tashabbus viloyatda yangi sanoat o‘sish nuqtalarini shakllantirish, eksportbop mahsulotlar ishlab chiqarishni kengaytirish va xalqaro investitsiyaviy hamkorlikni mustahkamlashga xizmat qilishi qayd etildi.