Musobaqaning ochilish marosimida so‘zga chiqqanlar O‘zbekistonda sport sohasiga berilayotgan e’tibor natijasida badiiy gimnastika ham qizlar o‘rtasida tobora ommalashib borayotganini ta’kidlab, barcha musobaqa ishtirokchilariga omad tilasdi.

Gran-pri musobaqasi Ekologiya, atrof-muhitni muhofaza qilish va iqlim o‘zgarishi vazirligi, Sport vazirligi, Xalqaro sport klublari Assotsiatsiyasi hamda Samarqand viloyati hokimligi hamkorligida tashkil etildi.

Turnirda Belorus, Ispaniya, Rossiya, Moldova, Turkiya, Tojikiston, Ozarbayjon, Qozog‘iston, Xitoy Xalq Respublikasi kabi 12 ta davlatdan kelgan 452 nafar mahoratli gimnastikachi ishtirok etmoqda. Qizlar yakkalik va guruh dasturlarida ko‘pkurash hamda halqa, to‘p, bulava va tasma kabi predmetlar bilan mashq bajarish bo‘yicha bahslashadi. Ularning har bir chiqishi xalqaro mutaxassislar tomonidan baholanadi.

Maʼlumot o‘rnida aytish kerakki, musobaqada samarqandlik badiiy gimnastikachi qizlar — Taxmina Ikromova, Vilana Savadyan, Amalya Mamedova O‘zbekiston terma jamoasi tarkibiga kiritilgan.

“East Cup and Olympic Stars” turniri nafaqat sportchilar o‘rtasidagi raqobatni kuchaytiradi, balki badiiy gimnastikaning jismoniy tarbiya bilan bir qatorda ma’naviy go‘zallikni, nafosatni va shaxs kamolotini shakllantirishdagi o‘rni naqadar muhim ekanini yana bir bor namoyon etadi.