Ramazon hayiti arafasida viloyatimizning Urgut, Bulung‘ur, Nurobod va Samarqand tumanlaridagi 21 ta mahallada shu maqsadga qaratilgan ma’naviy-ma’rifiy, mehr-muruvvat tadbirlari o‘tkazilmoqda.

Joylarda tashkil etilayotgan ushbu tadbirlarda teatrlashtirilgan sahna ko‘rinishlari, turli millat vakillarining folklor-etnografik ansambllari badiiy chiqishlari, milliy maqom, raqs va xalq og‘zaki ijodiyoti namunalari, lapar, aytishuvlar ijrosi, “Liboslarda jilolangan qadriyat” shiori ostida turli millat vakillari tomonidan milliy liboslar namoyishi, “Mehr-oqibat dasturxoni” shiori ostida turli millatlarning milliy taomlari ko‘rgazmalari tashkil etilmoqda.

Jumladan, Urgut tumanining qo‘shni Tojikiston Respublikasi bilan chegaradosh hududida joylashgan “Tinchlik” mahallasida bayram shodiyonalari ko‘tarinki ruhda boshlandi. Unda mahalliy aholi bilan birga, Tojikiston, Turkiya, Yaponiya va Janubiy Koreyadan kelgan mehmonlar ishtirok etishmoqda.

Konsert dasturlari, teatr tomoshalari, milliy sport musobaqalari va ko‘rgazmalar barchaga manzur bo‘lyapti.

Bayram tadbirida O‘zbekiston mahallalar uyushmasi mas’ul xodimi Suyarjon Qurbonqulov, uyushmaning viloyat boshqarmasi boshlig‘i Sherali Yo‘ldoshev,O‘zbekiston xalqaro Islom akademiyasi birinchi prorektori Habibullo Sadibaqosev va tuman hokimligi mas’ullari qatnashmoqda.

“Tinchlik” mahallasida 1605 nafar aholi yashaydi. 364 xonadon, 394 oila bor. Aholining 30 foizini tojik millatidagilar tashkil qiladi.

Mahalla bog‘dorchilik va piyozchilikka ixtisoslashgan.

Tadbirlar tumanning Vatkan-Qo‘zibek, Rahmatobod, Mirzabog‘lon-Chep mahallalarida ham davom etmoqda.