Viloyat hokimi Adiz Boboyevning Qorasuv massivida mahalla fuqarolar yig‘inlari faollari hamda “mahalla yettiligi” vakillari bilan o‘tkazgan uchrashuvida massivda aholi uchun bozor yo‘qligi masalasi ko‘tarilgan edi. Ushbu masala o‘rganilib, massiv markazida zamonaviy "Eko bozor" tashkil etish bo‘yicha mas’ullarga topshiriqlar berildi. Oradan ko‘p vaqt o‘tmay, hudud markazida joylashgan va foydalanilmay turgan bino qayta ta’mirlanib, unda meva-sabzavot hamda qishloq xo‘jaligi mahsulotlari savdosiga ixtisoslashgan “Eko bozor” tashkil etildi. Yangi bozor zamonaviy talablarga javob beradigan infratuzilma, qulay savdo rastalari va sanitariya sharoitlari bilan ta’minlangan.

Bozorning ochilish marosimida ishtirok etgan viloyat hokimi aholi uchun qulay sharoitlar yaratish masalasi doimiy e’tiborda ekanini ta’kidladi. Shuningdek, bunday loyihalar hudud aholisi turmush darajasini yaxshilash, yangi ish o‘rinlari yaratishda muhim ahamiyat kasb etishi qayd etildi.

Endilikda Qorasuv massivida istiqomat qiluvchilar o‘zlariga yaqin hududda, barcha qulayliklarga ega zamonaviy bozordan foydalanish imkoniyatiga ega bo‘ldilar.