Unga ko‘ra, 18,5 gektar maydonda 6 ta ishlab chiqarish korxonasi tashkil etiladi. Loyihaning umumiy investitsiya hajmi 40 mln. AQSH dollarini tashkil etadi. Natijada tumanda 350 ta yangi ish o‘rni yaratiladi hamda yillik eksport hajmi 5 mln. AQSH dollariga ortadi.

"Kenno" sanoat parkida innovatsion modul uylar, maxsus texnikalar uchun tirkamalar va kuzovlar, qurilish materiallari ishlab chiqariladi. Shuningdek, chiqindilarni to‘plash va qayta ishlash ham yo‘lga qo‘yiladi. Loyiha joriy yilning sentyabr oyida ishga tushirilishi rejalashtirilgan. Dastlabki bosqichda plastik idishlar ishlab chiqarish, qog‘ozni qayta ishlash va tirkamalarni yig‘ish tarmoqlari ishga tushadi.

Viloyat hokimi Adiz Boboyev mahalliy hokimlik investorni loyihani amalga oshirishning barcha bosqichlarida har tomonlama qo‘llab-quvvatlashini ta’kidladi. Shuningdek, ushbu tashabbuslarning sanoatni rivojlantirish, yangi ish o‘rinlari yaratish va viloyatning eksport salohiyatini oshirishdagi ahamiyati qayd etilib, rejalashtirilgan loyihalarni jadallashtirish kerakligi aytildi.

"Kenno" sanoat parki tarkibidagi korxonalar 2028-yilgacha bosqichma-bosqich foydalanishga topshiriladi.