Viloyatning havo darvozasi hisoblangan Samarqand xalqaro aeroporti ko‘chasidan boshlangan o‘rganishlar chog‘ida ko‘p qavatli uylar fasadini tartibga keltirish, ko‘cha bo‘ylariga ekilgan gullarni mavsumga qarab yangilash, daraxtlarni sug‘orish, yo‘l infratuzilmasini yaxshilash hamda haydovchi va piyodalarning erkin harakatlanishi, xavfsizligini ta’minlash maqsadida piyodalar o‘tish yo‘laklari hamda yo‘l yotiq chiziqlarini qayta chizish zarurligi aytildi.

Samarqand shahrining Ibn Sino, Ro‘dakiy, Afrosiyob, Shohi Zinda, Katta o‘zbek trakti ko‘chalaridagi piyodalar yo‘laklarining holati, obodonlashtirish va ko‘kalamzorlashtirish ishlarining borishi, savdo do‘konlari va bekatlar oldida o‘rnatilgan peshlavhalar ahvoli o‘rganilib, aniqlangan kamchiliklarni bartaraf etish yuzasidan mas’ullarga tegishli topshiriqlar berildi.

- Obodlik bor joyda fayz-u baraka, unum, fuqarolar kayfiyatida ko‘tarinkilik bo‘ladi. Buning uchun esa ko‘chalarimiz obodligini ta’minlashimiz zarur,- dedi viloyat rahbari.

Viloyat rahbari faqatgina markaziy ko‘chalarga emas, barcha hududda birdek ishlar olib borilishi lozimligini, shaharning har bir mahallasi, ko‘chasi va yo‘llarida obodonlashtirish va ko‘kalamzorlashtirish ishlarini olib borish lozimligini ta’kidladi. Mahallalardagi chiqindilarni o‘z vaqtida olib chiqish, ko‘p qavatli uylar atrofini tozalash bo‘yicha tegishli vazifalar belgilandi.

Shuningdek, Payariq tumanidagi Imom Buxoriy majmuasi atrofini obodonlashtirish borasidagi ishlar ham ko‘zdan kechirilib, obodonlashtirish, bunyodkorlik ishlarini jadallashtirish yuzasidan mas’ullarga topshiriqlar berildi.