Uchrashuvda kompaniya hamkorligida amalga oshirayotgan ishlar, jumladan, Toshkent, Xorazm, Namangan va Samarqand viloyatlarida faoliyati yo‘lga qo‘yilgan salqin ichimliklar ishlab chiqarish korxonalari, ularning quvvati, yangi loyiha va ish o‘rinlarini yaratish masalalari muhokama qilindi.

- O‘tgan yili may oyida Jomboy tumanida ishga tushirilgan CCI zavodi biz uchun muhim qadam bo‘ldi. Yiliga 280 million litrgacha salqin ichimliklar ishlab chiqarayotgan korxonada 200 dan ortiq ish o‘rni yaratilgan. 2026-yilning birinchi choragida “CCI Samarkand limited” MChJ negizida yana yangi investitsiya loyihasi amalga oshirilib, mashhur brend ichimliklar ishlab chiqarish hajmi yanada kengaytiriladi. Shuningdek, Samarqand shahridagi “Samavto” zavodida yangi avtomobillar ishlab chiqarib, qo‘shimcha ish o‘rinlari yaratishni rejalashtiryapmiz,- dedi Furkan Aydin.

Muloqot davomida Adiz Boboyev viloyatda xorijiy sarmoyadorlar uchun qulay shart-sharoitlar yaratilayotgani va investorlar bilan uzoq muddatli, samarali hamkorlikni qo‘llab-quvvatlashini bildirdi.

- Samarqandga kelayotgan mahalliy va xorijiy sayyohlar oqimi yil sayin ko‘payib bormoqda, - dedi Adiz Boboyev. - Shu bois shaharda jamoat transporti, xususan, mikroavtobuslarga talab yuqori. O‘ylaymanki, hamkorlik doirasida ushbu turdagi transport vositalari ham ishlab chiqarish yo‘lga qo‘yilsa, samarali bo‘ladi.

Biz bu borada barcha zarur infratuzilma va logistika imkoniyatlarini yaratishga tayyormiz.

Uchrashuvdan so‘ng Samarqand tumanidagi qiymati 4 million dollarlik «Samarqand ichimligi» ulgurji yetkazib berish markazining ochilishi marosimi bo‘lib o‘tdi.

Mazkur markazda 30 dan ziyod yuk avtomashinasi viloyatdagi savdo nuqtalariga 38 turdagi salqin ichimliklar yetkazib beradi. Korxonada 100 nafardan ziyod yoshlarning bandligi ta’minlandi.