Hayit namozi oldidan viloyat hokimi Adiz Boboyev hamda mutasaddi rahbarlar tomonidan majmuada yaratilgan sharoitlar yana bir bor ko‘zdan kechirildi.

Namoz avvalida so‘zga chiqqan O‘zbekiston musulmonlari idorasi raisining birinchi o‘rinbosari Homidjon Ishmatbekov bu yilgi Qurbon hayiti o‘zgacha ruhda o‘tayotganini, unda mehr-muruvvat, saxovat va hamjihatlik g‘oyalari ustuvor ahamiyat kasb etayotganini ta’kidladi. O‘tkazilayotgan xayriya tadbirlari, ehson va ko‘maklar jamiyatda o‘zaro birdamlik va insonparvarlik tuyg‘ularini yanada mustahkamlashga xizmat qilayotgani qayd etildi.

Shuningdek, Prezidentimizning "Muborak Qurbon hayiti munosabati bilan aholini davlat tomonidan qo‘llab-quvvatlash va mehr-saxovat tadbirlarini samarali tashkil etish to‘g‘risida"gi qarori ijrosi doirasida kam ta’minlangan oilalarga yordam ko‘rsatish, bemorlar uchun davolanish xarajatlarini qoplash, bepul jarrohlik amaliyotlarini tashkil etish ishlari izchil olib borilayotgani haqida ma’lumot berildi.

Hayit namozi yakunida yurtimiz tinchligi, xalqimiz farovonligi va mamlakatimiz ravnaqi uchun ezgu duolar qilindi.

Ayni paytda viloyatning barcha hududlarida Qurbon hayiti munosabati bilan aholining ijtimoiy himoyaga muhtoj qatlamlarini qo‘llab-quvvatlash, mehr-oqibat va saxovat tadbirlari davom etmoqda.