Вилоят ҳокими вазифасини бажарувчи Адиз Бобоев Глобал туризм форуми (GTF) ташкилоти вакиллари билан учрашди.

GTF – туризм, ҳукумат, инвестициялар ва инновациялар соҳасидаги глобал етакчиларни бирлаштирадиган ва халқаро тадбирларни ташкил этувчи ташкилот. Ҳар йили Глобал туризм форуми давлат раҳбарлари, туризм вазирлари, бош директорлар ва глобал инвесторлар иштирокида Брюсселда ўтказиладиган асосий йиллик йиғилишга мезбонлик қилади. Асосий саммитдан ташқари, GTF йил давомида Европа, Яқин Шарқ, Осиё ва Африкадаги асосий туризм бозорларида хавфсизлик бўйича саммит, сармоявий давра суҳбатлари, минтақавий форумлар ва ихтисослаштирилган саммитларни ташкил қилади.

Вилоят раҳбари ташкилот нуфузи ва фаолиятини юқори баҳолаб, Самарқандда ўтказилиши кутилаётган форум юртимиз, умуман, вилоят туризм салоҳиятини янада оширишда муҳим аҳамият касб этишини таъкидлади.