Нуробод туманининг Оқсой маҳалласи ҳудудида, тоғлар бағрида замонавий дам олиш маскани лойиҳаси амалга оширилмоқда.

Глобал инвестиция форумидаги кўргазмада мазкур лойиҳанинг тақдимоти ўтказилди.

- Бу лойиҳани амалга ошириш учун қарийб 18 минг евро маблағ сарфланади, - дейди лойиҳа раҳбари Алишер Назаров. – Қурилиш ишлари шу йилнинг биринчи чорагида бошланган бўлиб, 2024 йил 4-чорагида якунланиши режалаштирилган.

Самарқандда ишлаб чиқарилаётган кўчма автооромгоҳ ҳам кўргазмадан жой олган.

- Бу тиркамани енгил автомобиллар ҳам торта олади, - дейди тадбиркор Манучеҳр Аҳмедов. – Оғирлиги 500 килограм бўлган бу автооромгоҳ икки хилда ишлаб чиқарилмоқда. Ичида барча шароитлари бор: совитиш ва иситиш қурилмалари, мебель, музлатгич, ошхона жиҳозлари, газ баллон ва плита, электр чироқлари, аккумулятор ёки қуёш панеллари ўрнатилган.

Кўргазмада “Ўзбекистон вертолётлари” масъулияти чекланган жамиятининг тақдимотлари ҳам кўпчиликнинг эътиборини тортди.