Самарқандда бошланган халқаро зиёрат туризми ҳафталиги доирасида белгиланган “Замонавий ислом меъморчилиги” кўргазмаси кўҳна кентнинг янги ташриф қоғозига айланаётган Самарқанд халқаро туристик маркази “Боқий шаҳар” мажмуасида бўлиб ўтди.

Унда юртимизда ислом меъморчилиги йўналишида фаолият юритаётган ҳунарманд ва хаттотлар ўз ишларини намойиш қилишди.

Ҳафталик иштирокчилари “Мовароуннаҳрда адабий маданият” мавзусида ташкил этилган ислом амалий санъати фестивал-ярмаркасида қатнашиш асносида “Боқий шаҳар” мажмуаси, бу ерда фаолият юритаётган ҳунармандлар, бозор фаолияти билан яқиндан таниши имкониятига эга бўлишди. Шунингдек, мажмуада туркиялик машҳур хаттот, Мармара университети профессори Афзалиддин Қиличнинг маҳорат дарси ташкил этилди.