Фиқх олимларидан бўлиб, 552/1157 йили вафот этган. Унинг араб тилида ёзилган «Шарҳ ал-Жомиъ ал-кабир» («Жомиъ ал-кабир»нинг шарҳи») номли китоби бизгача етиб келган. 

Бу асар машҳур имом Абу Абдуллоҳ Муҳаммад ибн ал-Ҳасан аш-Шайбонийнинг (189/804 вафот этган) «Жомиъ ал-кабир» («Катта тўплам») номли китобига ёзилган шарҳдир. Турк олими Ҳожи Халфанинг ёзишича, бу шарҳ бир неча жилддан иборат. Аммо бизгача фақат биринчи жилди етиб келган, холос. Бy биринчи жилд «Китоб ас-салот» («Намоз ҳақида китоб»), «Китоб ал-имон» («Имон ҳақида китоб»), «Китоб ан-никоҳ» («Никоҳ ҳақида китоб»), «Китоб аш-шаҳодат» («Шаҳодат китоби»), «Китоб ат-талоқ» («Талоқ китоби»), «Китоб ал-масоил» («Диний масалалар китоби»), «Китоб аз-замон» («Йўқолган нарсани қайтариб бериш китоби»), «Китоб ал-қазо» («Ҳукм китоби») каби саккиз бобга бўлинади. Ҳар қайси боб ўз навбатида бир неча майда қисмларга ажралади.