.

 O‘zbekiston Respublikasining “Chiqindilar to‘g‘risida”gi Qonunining 11-moddasi, “Soliq va byudjet siyosatining 2024-yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi Qonunining 4-moddasi, O‘zbekiston Respublikasi Prezidentining 2020-yil 29-sentabrdagi “Maishiy va qurilish chiqindilari bilan bog‘liq ishlarni boshqarish tizimini yanada takomillashtirish chora-tadbirlari to‘g‘risida” PQ-4845-son qarori, Vazirlar Mahkamasining 2019-yil 6-fevraldagi “Chiqindilar bilan bog‘liq ishlarni amalga oshirish sohasidagi normativ-huquqiy hujjatlarni tasdiqlash to‘g‘risida” 95-son qarori, viloyat hokimi o‘rinbosari (A.Shukurov)ning 2024-yil 26-martdagi (161/01-30-sonli) bildirgisi, viloyat Ekologiya, atrof-muhitni muhofaza qilish va iqlim o‘zgarishi boshqarmasining 2024-yil 5-martdagi (01-950-sonli) murojaati, viloyat Iqtisodiyot va moliya bosh boshqarmasining 2024-yil 1-martdagi (01-05/38/202-sonli) xulosasiga asoslanib, viloyatning shahar va tumanlari hududidagi maishiy chiqindilarni olib chiqib ketish xizmatlarini takomillashtirish, hududlarning ekologik va sanitariya holatini yanada yaxshilash maqsadida xalq deputatlari viloyat Kengashining oltinchi chaqiriq, to‘qson sakkizinchi sessiyasi

QAROR QILADI:

1. O‘zbekiston Respublikasining “Soliq va byudjet siyosatining 2024-yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi Qonuniga asosan sanitariya jihatdan tozalash bo‘yicha aholiga ko‘rsatiladigan xizmatlarni realizatsiya qilishga doir aylanmaga nol darajali stavka bo‘yicha soliq solinishi bekor qilinganligi ma’lumot uchun qabul qilinsin.
2. Samarqand viloyatining shahar va tumanlarida maishiy chiqindilarni to‘plash va olib chiqib ketish bo‘yicha xizmat ko‘rsatish uchun majburiy to‘lov tariflari miqdori ilovaga muvofiq ma’qullansin.
3. Viloyat hokimining o‘rinbosari (A.Shukurov) shahar va tumanlarda qattiq maishiy chiqindilarni to‘plash va olib chiqib ketish bo‘yicha xizmat ko‘rsatish uchun majburiy to‘lov tariflari miqdorini tasdiqlash to‘g‘risidagi viloyat hokimining qarori loyihasini belgilangan tartibda ishlab chiqsin.
4. Viloyat Ekologiya, atrof-muhitni muhofaza qilish va iqlim o‘zgarishi boshqarmasi (K.Shermatov), viloyat Sog‘liqni saqlash boshqarmasi (S.Zayniyev),viloyat Sanitariya epidemiologiya osoyishtaligi va jamoat salomatligi boshqarmasi (M.Nasretdinova) shahar va tumanlar hokimliklari fuqarolarning huquqiy va sanitariya-ekologik savodxonligini oshirishga qaratilgan tushuntirish ishlarini tashkil etsin.
5. Xalq deputatlari viloyat Kengashining 2023-yil 22-sentabrdagi “Hududlarda maishiy chiqindilarni to‘plash va olib chiqib ketish bo‘yicha xizmat ko‘rsatish uchun majburiy to‘lov tariflari miqdorini ma’qullash to‘g‘risida” VI-90-88-7-0-K/23-son qarori o‘z kuchini yo‘qotgan deb hisoblansin.
6. Viloyat televideniyesi (M.Ixtiyorov), “Zarafshon” va “Самаркандский вестник” gazetalari birlashgan tahririyati (F.Toshev)ga qaror ijrosi bo‘yicha hududlarda amalga oshirilgan ishlarni keng yoritib borish tavsiya etilsin.
7. Ushbu qaror rasmiy e’lon qilingan kundan e’tiboran kuchga kiradi. 8. Mazkur qaror ijrosini nazorat qilish xalq deputatlari viloyat Kengashining Sanoat, transport, qurilish, kommunal soha va aholiga xizmat ko‘rsatish masalalari bo‘yicha doimiy komissiyasi (O‘.Saidmurodov) hamda viloyat hokimi o‘rinbosarlari (F.Abilov, A.Shukurov) zimmalariga yuklansin.

Kengash raisi                                                      E.Turdimov