Самарқанд темир йўл вокзалида республикамиз Қуролли Кучлари резервига бўшатилган ҳарбий хизматчиларни тантанали кутиб олиш маросими бўлиб ўтди.

Вилоят ва шаҳар ҳокимлиги, вилоят мудофаа ишлари бошқармаси вакиллари ҳамда аскарларнинг ота-оналари иштирокида ўтган тадбирда сўз олганлар мамлакатимиз ҳарбий соҳасида кенг кўламли ислоҳотлар амалга оширилаётгани, аскарларни жисмоний ва маънавий баркамол, интеллектуал етук, мустаҳкам эътиқодли қилиб тарбиялашга алоҳида эътибор қаратилаётганини таъкидлашди.

– Муддатли ҳарбий хизматни ўташ мобайнида мамлакатимиз хавфсизлиги ва ҳудудий яхлитлигини таъминлашга қодир миллий армиямиз ҳамда ҳарбий хизматчиларни ижтимоий ҳимоя қилишнинг мустаҳкам ва ишончли тизими яратилганига гувоҳ бўлдик, – дейди пайариқлик аскар Шерали Худойбердиев. – Жумладан, ҳарбий тузилмаларимиз замонавий техника, қурол-яроғ ва етук мутахассислар билан таъминланиб, қисмларда соғлом муҳит яратилган. Эл-юрт олдидаги муқаддас бурчимни адо этиш билан биргаликда билимим, намунали хулқим ва албатта, жанговар тайёргарлигимни намоён этиб, олий ўқув юртларига кириш учун бериладиган имтиёзли йўлланмани қўлга киритиб қайтяпман.