Самарқанд шаҳрида янгиланган намунавий лойиҳалар бўйича арзон уй-жойлар қурилиши, монтаж ишларининг сифатига қўйилаётган талабларга бағишланган семинар бўлиб ўтди.

Қурилиш-пудрат ташкилотлари мутасаддилари ҳамда тадбиркорлар иштирок этган семинарда Президентимизнинг 2016 йил 21 октябрдаги «2017-2021 йилларда қишлоқ жойларда янгиланган намунавий лойиҳалар бўйича арзон уй-жойлар қуриш дастури тўғрисида»ги қарори мазмун-моҳияти, арзон, замонавий, шинам, имтиёзли ипотека кредити асосида қурилаётган мазкур уй-жойларнинг аҳоли учун имконият ва қулайликлар яратишдаги аҳамияти хусусида сўз юритилди. Қурилиш объектларида бажариладиган қурилиш-монтаж ишларини сифатли амалга ошириш бўйича мутахассисларнинг фикр-мулоҳазалари, таклифлари тингланди.

Семинар давомида «Акфа», «iBoard», «Liderline», «Airfel» корхоналарида ишлаб чиқарилаётган маҳсулотларнинг тақдимоти ҳам ўтказилди.

Тадбирда вилоят ҳокимининг ўринбосари О.Очилов иштирок этди.

Ўз мухбиримиз.