Президентимизнинг 2016 йил 21 октябрдаги "2017-2021 йилларда қишлоқ жойларда янгиланган намунавий лойиҳалар бўйича арзон уй-жойлар қуриш дастури тўғрисида"ги қарорига асосан жорий йилда вилоятимиз туманларида янгиланган лойиҳадаги 1 758 та уйлар қурилмоқда. 

 Жомбой туманида жорий йилда биринчи ва иккинчи турдаги 102 та уйлар қурилмоқда. 

– Бунинг учун йил бошидан 2 та 16 хонадонли ва 70 та 3 хонали уйлар қуриш учун 7 та қурилиш корхонаси танлаб олинди, – дейди туман ҳокимлиги бош мутахассиси Маҳмуд Абдураҳимов. – Уларга янги уйларни 9 ой муддатда қуриб фойдаланишга топшириш шарти қўйилди. Бу қарор билан уй харид қилаётган аҳолига бир қатор қулайликлар яратилди. Жумладан, биринчи ва иккинчи турдаги уйлар учун дастлабки тўлов уй-жой умумий қийматининг 15 фоизи миқдорида белгиланди. Қолган қисми бўйича 7 фоизлик имтиёзли давр билан 15 йилга уй эгаси номига кредит ажратилади. Шунингдек, Вазирлар Маҳкамасининг 2016 йил 24 ноябрдаги "Ариза берувчи-уй қурувчининг фуқароларнинг ўзини ўзи бошқариш органлари тавсиялари асосида 2017-2021 йилларда қишлоқ жойларда янгиланган намунавий лойиҳалар бўйича арзон уй-жойлар қуриш дастурида иштирок этиши тартиби тўғрисидаги низомни тасдиқлаш ҳақида"ги қарорига асосан уй олиш истагидаги фуқаро доимий яшаш жойидаги маҳалла фуқаролар йиғини раисининг ёзма тавсиясига кўра "Қишлоққурилишинвест" масъулияти чекланган жамияти вилоят филиали билан шартнома тузиш тартиблари жорий этилди. 

Туманнинг Хитойпоён маҳалласида истиқомат қилувчи Шуҳрат Жўраев ва Волида Анорбоева ака-укалари билан уч оила бир ҳовлида яшарди. Иккаласи ҳам ишли бўлса-да, биратўла уй сотиб олишга имконияти етмасди. Президент қарори асосида қурилаётган арзон уй-жойлар бу каби оилаларнинг алоҳида уй-жойли бўлишига имкон яратди. 

– Ўзим туман "Ягона дарча" марказида, турмуш ўртоғим болалар боғчасида ишлардик, лекин маошдан орттириб, уйга етадиган маблағ жамғариб бўлмасди, – дейди Ш.Жўраев. – Уйда эса ота-онам, акам ва оилам, жами 12 киши яшаймиз. Президентимиз қарори асосида туманнинг Узуновул массивида 16 хонадонга мўлжаллаб қурилаётган арзон нархдаги уй-жойлардан олиш учун маҳалламиздан тавсиянома олиб, "Қишлоққурилишинвест" масъулияти чекланган жамиятига топширдим. Халқ банки туман филиалига дастлабки бадал сифатида 11 миллион 605 минг сўм маблағ тўладим. Шундан сўнг 6 ойлик имтиёзли давр билан 15 йил муддатга 77 миллион сўмга асосий шартномани имзоладик. Энди ўз уйимиз бўлади.

Бу ниятлар ижобати учун қурувчилар ҳам астойдил ҳаракат қилмоқда. Шу кунгача белгиланган ишларнинг катта қисми бажарилган. Қурувчилар 9 ойлик муддатга қарамасдан уйларни юртимизнинг энг катта шодиёнаси арафасида ўз эгаларига топширишга ҳаракат қилмоқда. 

– Каттақишлоқ маҳалласида 2 қаватли 16 хонадонга мўлжалланган 2 ва 3 хонали уй қурилишини бошлаганимизга уч ой бўлди, – дейди "Афсона омад таъмир қурилиш" хусусий корхонаси иш бошқарувчиси Хуршид Абдурасулов. – Биринчи қаватда қурилишни тугатиб, электр монтаж ишлари бажариляпти, ой сўнгидан эса пардозлаш, сув, газ, канализация тармоқларини улашни бошлаймиз. Эшик-ромлар "Қишлоққурилишинвест" МЧЖ вилоят филиали томонидан имтиёзли нархда берилади, бошқа зарур қурилиш материалларини тайёрлаб қўйганмиз. Буюртмачи талаби асосида уйни яшаш учун тайёр ҳолда муддатидан олдин топширишни мақсад қилганмиз.

Шунингдек, бу уйларнинг ҳар бирида кўмир ва газга мослаштирилган индивидуал қозонхоналар, алоҳида сув тармоғи, канализация, омборхона ва гараж қурилади. Бир сўз билан айтганда, барча шароити мужассам бўлган бу уйлар қишлоқ жойда шаҳардагидек шароитга эга бўлади.