Асаларичиликнинг ўзига хос сир-асрорлари мавжуд бўлиб, машаққатли меҳнатни талаб этади. Тоза ва сифатли асал олиш учун баҳор фасли жуда қулай. Асаларилар ҳам тоза, озода жойни хоҳлайди.

Ургутнинг барча ҳудудларида асаларичиликни ривожлантириш учун қулай иқлим шароити мавжуд. Бундан унумли фойдаланган ургутликлар мазкур соҳани ривожлантириш ҳамда иқтисодиётнинг сердаромад ва истиқболли тармоғига айлантириш борасида диққатга сазовор ишларни амалга ошириб келишмоқда.

Вилоят ҳокимлигининг туризмни ривожлантириш департаменти ва Ургут туман ҳокимлиги ҳамкорлигида Мустақиллик майдонида “Асал сайли” ташкил этилди. Унда ургутлик асаларичилар ўзлари етиштирган асал навлари намойишини ўтказишди. Сайил меҳмонлари ушбу мазаликлардан таътиб кўриш имконига эга бўлишди. Шунингдек, тадбир давомида ҳунармандлар, турли фолклор гуруҳлари ва хонандалар иштирок этиб, сайил иштирокчиларига яхши кайфият улашишди.