Бугун – 16 март куни “Turkish Airlines” авиакомпанияси самолёти “Истанбул – Самарқанд – Истанбул” йўналиши бўйича биринчи қатновни амалга оширди. 

Бортида “Turkish Airlines” авиакомпанияси масъул ходимлари, Ўзбекистон ва туркиялик йўловчилар бўлган замонавий ҳаво лайнери Самарқанд халқаро аэропортида тантанали кутиб олинди.

Самарқанд шаҳар ҳокими Ф.Раҳимов, “Turkish Airlines” авиакомпанияси директори, бошқарув раиси ўринбосари Билал Экши, Туркия Республикасининг Ўзбекистондаги Фавқулодда ва мухтор элчиси Аҳмед Башар Шен ва бошқалар давлатларимиз ўртасидаги азалий дўстлик алоқалари тобора ривожланиб бораётганини таъкидлади. Бунда икки давлат раҳбарларининг бу алоқаларни янада ривожлантиришга алоҳида эътибор қаратаётгани, туризм йўналишида ҳамкорлик кўлами кенгаяётгани қайд этилди.

Ўзбекистон Республикаси Президенти Шавкат Мирзиёевнинг ўтган йил Туркияга амалга оширган давлат ташрифидан сўнг 2017 йилнинг 30 октябридан “Ўзбекистон ҳаво йўллари” миллий авиакомпаниясининг “Самарқанд – Истанбул – Самарқанд” йўналиши бўйича мунтазам қатнови йўлга қўйилди.

Айни пайтда мазкур йўналиш бўйича миллий авиакомпаниямизнинг замонавий “Airbus А320” ва “Boeing 757” ҳаво кемалари ҳафтанинг душанба ва пайшанба кунлари қатновни амалга ошираяпти.

Эндиликда “Turkish Airlines” авиакомпанияси ҳам ҳафтанинг сешанба ва жума кунлари Истанбул ва Самарқандга тўғридан-тўғри рейсларни йўлга қўйди.

Ғолиб Ҳасанов.