Вилоят ҳокимлиги Туризмни ривожлантириш департаментида туризмни ривожлантириш бўйича жамоатчилик кенгашини тузиш масаласи юзасидан тадбир бўлиб ўтди.

Тадбирда вилоятимизда туризм соҳасида фаолият олиб бораётган ташкилотлар вакиллари, гидлар ҳамда блогерлар иштирок этишди. Тадбир иштирокчиларига Кенгашни тузишдан мақсад, унинг туризм соҳасини ривожидаги ўрни ва Кенгаш низоми лойиҳаси таништирилди. Музокара ва мунозаралардан сўнг Самарқанд вилояти ҳокимлиги ҳузуридаги Туризмни ривожлантириш масалалари бўйича жамоатчилик кенгаши раисини сайлаш масаласи кўриб чиқилди. Овоз бериш йўли билан “Ипак йўли” туризм халқаро университети проректори жамоатчилик кенгаши раиси этиб сайланди.