Халқ депутатлари вилоят Кенгаши ҳузуридаги Ижтимоий шериклик бўйича жамоат комиссиясининг кенгайтирилган йиғилиши бўлиб ўтди.

Вилоятдаги давлат идоралари, нодавлат нотижорат ташкилотлари вакиллари иштирок этган йиғилишда Ўзбекистон Республикаси Президентининг 2018 йил 4 майдаги “Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида”ги Фармони мазмун-моҳияти хусусида сўз юритилди.

Шунингдек, тадбир доирасида грант танловларида иштирок этиш шартлари ва талаблари, грант лойиҳаларини тайёрлаш, ҳисоботларини тақдим этиш юзасидан давра суҳбати ўтказилди.

– Бугун нодавлат нотижорат ташкилотлари ислоҳотларнинг фаол иштирокчисига айланмоқда, – дейди Олий Мажлис ҳузуридаги Жамоат фонди маблағларини бошқариш бўйича Парламент комиссияси раиси ўринбосари Гавҳар Алимова. – Ижтимоий шериклик муносабатлари тобора мустаҳкамланиб, қатор лойиҳалар амалга ошириляпти. Дунё тажрибасида кам учрайдиган ҳолат – нодавлат нотижорат ташкилотларини грантлар орқали давлат томонидан қўллаб-қувватлаш эса йил сайин кенгайиб бормоқда.

Қувонарлиси, грант маблағларини сарфлашда давлат дастурлари ижросига ҳам катта эътибор қаратилмоқда.

Тадбирда “Сабр” ижтимоий-иқтисодий ривожланиш маркази, вилоят истеъмолчилар ҳуқуқларини ҳимоя қилиш жамиятлари бирлашмаси ва “Истиқбол” ёшлар тараққиёти маркази Олий Мажлис ҳузуридаги жамоат фонди ўтказган давлат гранти 1 ва 2-танловлари ғолиблари деб эълон қилинди. Ғолибларнинг лойиҳалари тақдимоти ўтказилди.

Йиғилишда вилоят ҳокимининг ўринбосари, хотин-қизлар қўмитаси раиси вазифасини бажарувчи Ҳ.Шодиева иштирок этди.

А.Мустафоқулов.