Президентимиз Шавкат Мирзиёев шу йил 11 январь куни Самарқанд вилоятига ташрифи давомида маҳаллий ҳокимликлар,

хўжалик бирлашмалари, тижорат банклари, саноат корхоналари раҳбарларига муҳим топшириқлар берган эди. Айни пайтда ушбу вазифалар ижросига қизғин киришилган.

Бу борада амалга оширилаётган ишлар юзасидан Самарқанд вилояти ҳокимининг биринчи ўринбосари Ж.Ўроқов маълумот берди:

- Президентимизнинг Самарқанд вилояти фаоллари иштирокида ўтказган йиғилиши баёнида белгиланган 131 та топшириқнинг ўз вақтида амалга оширилиши вилоятимиз иқтисодиётини мустаҳкамлаш, ҳудудларни ижтимоий-иқтисодий ривожлантириш ва аҳоли турмуш фаровонлигини оширишга хизмат қилади. Хусусан, 2019-2020 йилларда вилоятимизда саноат, хизмат кўрсатиш ва қишлоқ хўжалиги соҳаларини ривожлантириш мақсадида 859 та лойиҳа амалга оширилади. Ушбу лойиҳаларнинг умумий қиймати 12 триллион 68,4 миллиард сўмни ташкил этиб, уларнинг амалга оширилиши натижасида 18 минг 114 та иш ўринлари яратилади. Шунингдек, ижтимоий соҳани ривожлантириш, аҳолини уй-жой билан таъминлаш, қишлоқларни кўркамлаштириш, аҳоли саломатлигини сақлаш мақсадида ҳам истиқболли лойиҳаларни амалга оширамиз.