Самарқанд гарнизони офицерлар уйида Марказий ҳарбий округ Сержантлар тайёрлаш мактаби курсантлари иштирокида “Таянчим ва суянчим, фахру ифтихоримсан, муқаддас Ватан!” шиори остида учрашув ўтказилди.

Тадбирда Республика тарғибот гуруҳи раҳбари С.Ёқубов, Маънавият тарғибот маркази вилоят бўлими бошлиғи С.Санақулов, Ўзбекистон миллий академик драма театри актёри Ф.Бурҳонов ва бошқалар ҳарбийларни байрам билан табриклаб, мамлакатимиз хавфсизлиги, халқимиз осойишталигини таъминлашга қодир миллий армиямиз барпо этилганлигини фахр ва ифтихор билан тилга олдилар.

Учрашувда Ватан ҳимоячилари шаънига самимий дил изҳорлари билдирилди.

Ўзбекистон халқ артисти М.Мавлонов, Ўзбекистонда хизмат кўрсатган артист Э.Қайтаровнинг шўх қўшиқлари, Ўзбекистон Ёзувчилар уюшмаси аъзоси Д.Аҳророванинг Ватан ҳимоячилари мадҳ этилган шеърлари  тадбир иштирокчилари учун байрам совғаси бўлди.