Самарқанд шаҳрида академик лицей ва касб-ҳунар коллежлари ўқувчилари ўртасида Президент Ислом Каримовнинг “Она юртимиз бахту иқболи ва буюк келажаги йўлида хизмат қилиш – энг олий саодатдир” асари билимдони” кўрик-танловининг вилоят босқичи ўтказилди. 

Ўзбекистон Республикаси Мустақиллигининг йигирма беш йиллиги муносабати билан ўрта махсус, касб-ҳунар таълими муассасалари ўқувчиларининг интеллектуал қобилиятини янада ошириш, уларнинг ижтимоий-сиёсий билимларини ривожлантириш мақсадида ташкил этилган танловда ўқувчи-ёшлар асар асосида иншо ёзиб, тест саволларига жавоб бердилар.

– Президентимизнинг асари бўйича ўтказилган кўрик-танловда биринчи ўринга сазовор бўлганимдан ғурурланаман, – дейди Самарқанд педагогика коллежи ўқувчиси Нилуфар Зиёдиллаева. – Мазкур асарни жиддий мутолаа қилиш орқали мамлакатимизда амалга оширилаётган ислоҳотлар, сиёсий жараёнлардан яхши хабардор бўлдим.  Энг асосийси, жамиятда бўлаётган ўзгаришлар, дунёда рўй бераётган воқеа-ҳодисаларга биз, ёшларнинг дахлдор эканимиз, тинчлик ва тараққиётимиз учун курашиб яшашимиз лозимлигини англадим.

Танлов натижаларига кўра, иккинчи ўрин Самарқанд давлат университети қошидаги 1-сон академик лицей ва Пастдарғом педагогика ва спорт коллежи ўқувчиларига, учинчи ўрин эса Самарқанд давлат чет тиллари институти қошидаги академик лицейи ўқувчиларига насиб этди.

* * *

Шу куни олий таълим муассасалари ўртасида ҳам худди шу мавзуда ўтказилган кўрик-танлов ғолиблари тақдирланди.

Абдужаббор Пўлатов