Самарқандда Ўзбекистон Республикаси Олий суди ташаббуси билан никоҳ ва оила муносабатларига бағишланган учрашув ўтказилди.

Фуқаролик ишлари бўйича вилоят суди ва Самарқанд шаҳар хотин-қизлар қўмитаси ҳамкорлигида ташкил этилган тадбирда судьялар, Вазирлар Маҳкамаси ҳузуридаги “Оила” илмий-амалий тадқиқот маркази Самарқанд шаҳар бўлими ходимлари, маҳалла фуқаролар йиғинлари фаоллари, хотин-қизлар қўмиталари мутахассислари, нуронийлар ва ёшлар иштирок этди.

Ўзбекистон Республикаси Президентининг 2018 йил 2 февралдаги “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида”ги Фармонига мувофиқ хотин-қизлар қўмиталарининг давлат ва жамоат ташкилотлари билан ҳамкорликда оилаларни мустаҳкамлаш, ёшларни оилага тайёрлашга оид ваколатлари кенгайтирилди.

Маҳаллаларда хотин-қизлар билан ишлаш ва оилаларда маънавий-ахлоқий қадриятларни мустаҳкамлаш бўйича мутахассис штати жорий қилинди. Вазирлар Маҳкамаси ҳузурида “Оила” илмий-амалий тадқиқот маркази ва жойларда унинг ҳудудий бўлимлари ташкил этилди.

Таъкидландики, давлат ва жамоат ташкилотлари ҳамкорликда иш олиб бормагани, оила масаласига етарлича эътибор қаратилмагани оқибатида оилавий ажримлар йилдан-йилга кўпайди. Самарқанд вилоятида жорий йилнинг биринча ярмида 1601 оила суд орқали ажрашган.

Йиғилишда оилавий ажримлар оқибатида юзага келган ҳуқуқбузарлик ва жиноятчилик ҳолатлари, ёшлар таълим-тарбиясидаги камчиликлар мисоллар орқали таҳлил этилди. Диний идоралар вакиллари, маҳалла фаоллари ёшларни оилага тайёрлашда эътибор қаратилиши лозим бўлган масалалар, қайнона-келин муносабатлари, оилавий ажримларнинг олдини олиш юзасидан фикр-мулоҳаза билдирди.

Тадбир якунида фуқароларнинг мурожаатлари эшитилди ва очиқ суд мажлислари ўтказилиб, ажралиш арафасида турган бир нечта оила яраштирилди.

F.Ҳасанов.