Вилоят Матбуот уйида адлия бошқармаси томонидан мустақиллик йилларида соҳада амалга оширилган ислоҳотлар, янги ҳуқуқий меъёрий ҳужжатлар мазмун-моҳияти ва нодавлат нотижорат ташкилотлари фаолиятига бағишланган матбуот анжумани ташкил этилди.

Анжуманда Президентимизнинг жорий йил 4 майдаги “Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида”ги Фармони мазмун-моҳияти ҳақида ҳам сўз юритилди. Фармонда нодавлат нотижорат ташкилотларни қўллаб-қувватлашга янгича ёндашувлар кўзда тутилгани таъкидланди.

– Вилоятимизда бугунги кунда 750 дан ортиқ нодавлат нотижорат ташкилот фаолият кўрсатмоқда, – дейди вилоят адлия бошқармаси бўлим бошлиғи Хосият Абдураҳмонова. – Фуқаролик жамиятининг ушбу институтлари аҳолининг ҳуқуқлари ва қонуний манфаатлари, демократик қадриятларни ҳимоя қилиш, ижтимоий, маданий-маърифий мақсадларга эришишида муҳим роль ўйнамоқда.

Тадбир сўнгида иштирокчилар ўзларини қизиқтирган саволларга мутахассислардан жавоб олди.

Ғолиб Абдусаломов.