Самарқанд шаҳрида “Фуқароларнинг ўзиниўзи бошқариш органларидаги энг намунали диний маърифат ва маънавий-ахлоқий тарбия масалалари бўйича маслаҳатчи” танловининг вилоят босқичи ўтказилди.

Унда танловнинг туман ва шаҳар босқичида ғолибликни қўлга киритган 16 нафар маслаҳатчи иштирок этди.

Тадбирнинг очилиш маросимида сўзга чиққанлар маслаҳатчилар зиммасидаги масъулият, уларнинг бу вазифаларга нисбатан ёндашувига алоҳида тўхталиб ўтдилар.

Маслаҳатчилар маҳалладаги нотинч оилаларни ўрганиш, ёшларнинг ҳуқуқий маданиятини ошириш, жиноятчиликнинг олдини олиш, ижтимоий-маънавий муҳитни яхшилаш борасида амалга оширган ишлари бўйича тақдимот ўтказдилар. Фаолияти юзасидан берилган саволларга жавоби, иш ҳужжатлари, маълум муаммо бўйича саҳна кўринишлари ҳам алоҳида баҳоланди.

Танлов якунига кўра, Тайлоқ тумани “Пайшанба-Сиёб” маҳалласи маслаҳатчиси Тансиқ Мажидова биринчи ўринни эгаллаб, танловнинг республика босқичига йўлланма олди.

Иккинчи ўрин Каттақўрғон шаҳар “Қўшҳовуз” маҳалласи маслаҳатчиси Гулноза Эшқувватова, учинчи ўрин Иштихон туманидаги “Тойтуёқ” маҳалласи маслаҳатчиси Гулчеҳра Ўроқовага насиб этди.

Г.Мўминова