Самарқанд шаҳрида Ўзбекистон Республикаси Олий Мажлиси ҳузуридаги нодавлат нотижорат ташкилотлари ҳамда фуқаролик жамиятининг бошқа институтларини қўллаб-қувватлаш жамоат фонди, фуқаролик жамияти шаклланишини мониторинг қилиш мустақил институти вилоят бўлими, вилоят ҳокимлиги, ЎзННТ МА вилоят ахборот ресурс маркази ҳамкорлигида семинар ўтказилди.

Семинарда вилоятдаги давлат ва жамоат ташкилотлари, нодавлат нотижорат ташкилотлари вакиллари иштирок этди.

Тадбирда муҳим ижтимоий аҳамиятга молик лойиҳаларни тайёрлашда нодавлат нотижорат ташкилотлари ва фуқаролик жамиятининг бошқа институтларига услубий ҳамда ахборот-маслаҳат кўрсатиш, уларнинг давлат грантлари танловидан хабардорлигини ошириш борасида сўз юритилди.

Таъкидланганидек, фонд томонидан эълон қилинаётган давлат грантларида Самарқанд вилоятидан бир қатор нодавлат нотижорат ташкилотлари фаол иштирок этмоқда. “Умид Д”, “Сабр”, “Ҳаёт”, “Мураббий”, “Зарафшон ЭКО” ва бошқалар шулар жумласидандир .

Тадбирда парламент комиссияси аъзоси, Республика болалар ижтимоий мослашув маркази раҳбари Васила Алимова лойиҳаларнинг мазмун-моҳияти ҳамда грант учун танлов жараёнининг очиқлик асосида олиб борилишига тўхталиб ўтди.

Семинар давомида вилоят соғлиқни сақлаш, халқ таълими бошқармалари вакиллари нодавлат нотижорат ташкилотлари билан ҳамкорликда олиб борган ишлари ҳақида маълумот бердилар.