Самарқанд шаҳрида «Жамиятда ҳуқуқий маданият ва фуқаровий ўзини-ўзи англаш туйғусини юксалтиришда ННТларнинг ўрни ва роли» мавзуида давра суҳбати бўлиб ўтди.

Унда вилоят адлия, адвокатлар палатаси ҳудудий бошқармалари, вилоят хотин-қизлар қўмитаси, фуқаролик жамияти шаклланишини мониторинг қилиш мустақил институти, жамоат ва нодавлат нотижорат ташкилотлари вакиллари иштирок этди.

Давра суҳбати давомида аҳолининг ҳуқуқий маданиятини юксалтиришда давлат органлари ва фуқаролик жамияти институтларининг ўрни ҳамда роли, бу масалада давлат органлари ва ННТлар ўртасидаги ижтимоий шерикчилик муносабатларининг долзарб вазифалари бўйича маърузалар тингланди.

Тадбирда ижтимоий шериклик масаласида мавжуд ютуқ ва муаммолар, уларни бартараф этиш масалалари муҳокама этилиб, жамиятда ҳуқуқий маданиятни юксалтиришда ННТларнинг ролини кучайтириш юзасидан таклиф-мулоҳазалар билдирилди.