2015 йилнинг 1 май куни Самарқанд вилоят ҳокимлиги маданият ва спорт ишлари бошқармаси, вилоят соғлиқни сақлаш бошқармаси, “Камолот” ёшлар ижтимоий ҳаракати вилоят кенгаши ташаббуси билан вилоятда “Фавворалар сайли” байрами ўтказилади.

Шу куни эрталаб соат 10:00 дан 14:00 гача, кеч соат 17:00 дан 22:00 га қадар Самарқанд шаҳридаги Руҳобод майдони, “Йўлбарслар хиёбони”, “Шоирлар боғи”, Даҳбед ва Регистон кўчалари чораҳаси, Университет хиёбони, Самарқанд темир йўл вокзали майдони ва “Аэропорт” маҳалла маркази, шунингдек, Пайариқ, Челак, Ургут, Нуробод, Жума шаҳарларидаги фавворалар олдида сайл ўтказилади.

Тадбирларда олимлар ва соҳа мутахассислари фаввораларнинг яратилиш тарихи, улар қурилишидаги турли меъморчилик услублари, фаввораларнинг инсон саломатлигини мустаҳкамлаш, айниқса, асабни тинчлантиришдаги аҳамияти ҳақида қизиқарли маълумот берадилар.

Хушовоз санъаткорларнинг куй-қўшиқлари ижро этилади, ранг-тасвир асарлари намойиш қилинади, турли танловлар ўтказилади.