Самарқанд шаҳридаги вилоят яҳудий миллий-маданий марказида яҳудийларнинг “Песах” (Пасха)миллий байрами нишонланди.

- Ушбу байрам арафасида хотин-қизларимиз “Бахш”, “Оши сабо”, “Сирканез” каби миллий таомларни тайёрлашади, - дейди вилоят яҳудий миллий-маданий маркази раиси Григорий Олвовский. – Беморлар, якка-ёлғиз кексалар ҳолидан хабар олиб, уларга моддий ва маънавий ёрдам кўрсатамиз. Ҳафтада бир марта синагог-ибодатхонамизга келиб, урф-одатларимизга биноан  диний маросимларни ўтказамиз.

Тадбирга Исроил ва Россиядан ҳам меҳмонлар ташриф буюриб, байрам ва диний маросимларда иштирок этишди.

- Ўзбекистонга биринчи бор келишим, - дейди исроиллик меҳмон Авраам Амброзо. - Аммо, бу юртнинг табиати, одамларини, айниқса, тарихий-меъморий ёдгорликларини кўриб, маҳлиё бўлиб қолдим. Барча миллат ва элат вакилларининг тинч осмон остида аҳил яшаб келаётганликларига, миллий урф-одат, тили ва бошқа диний маросимларини амалга оширишларига имконият яратилганига ҳавасим келди.

Дилмурод Тўхтаев.