Самарқанд шаҳрида трамвай йўли қурилиши давом этмоқда. Яқинда “Ўзбекистон темир йўллари” акциядорлик жамияти томонидан трамвай йўл излари олиб келиниб, ўрнатиш ишлари бошлаб юборилди.

– Икки кун ичида Сартепа масканидан Буюк Ипак йўли ва Нарпай кўчалари кесишган ҳудудгача 4 километрга яқин темир йўл изларини ётқизиб чиқдик, – дейди “Ўзбекистон темир йўллари” акциядорлик жамиятига қарашли “ТЙМС – 203” корхонаси бош муҳандиси Обид Умматов. – Ҳозирча йўлнинг бир томонини ётқизиб чиқяпмиз. Наврўз байрамига қадар 16 километрлик йўл ётқизиб, Сартепа масканидан Темир йўл вокзалига қадар бўлган биринчи босқичли қурилиш ишларини тўлиқ ниҳоясига етказамиз.