Ўзбекистон Республикаси Президенти сайловини ўтказувчи 7-Самарқанд округ сайлов комиссиясининг йиғилиши ўтказилди. 

Комиссия раиси Яхшинор Аллаёров бошқарган мажлисда дастлаб округ ҳудудида сайлов участкаларини тузиш ҳақидаги масала кўриб чиқилди.

Ўзбекистон Республикасининг “Ўзбекистон Республикаси Президенти сайлови тўғрисида”ги Қонунига кўра, сайлов участкалари туман, шаҳар ҳокимликларининг тақдимномасига биноан, ҳарбий қисмларда эса қисмлар ёки ҳарбий қўшилмалар командирларининг тақдимномасига биноан округ сайлов комиссияси томонидан тузилади.

Сайлов участкалари сайловга камида олтмиш кун қолганида тузилади ва матбуотда эълон қилинади.

Вилоят сайлов комиссияси Самарқанд вилоятидаги сайловчилар умумий сони 2 миллион 294 минг 602 кишини ташкил этишини инобатга олиб ҳамда тақдимномалар асосида округ бўйича 957 та сайлов участкасини тузиш тўғрисида қарор қабул қилди.

Мажлисда комиссия ваколатига оид бошқа масалалар ҳам кўриб чиқилиб, тегишли қарорлар қабул қилинди.

Ўзбекистон Республикаси Президенти сайловини ёритиш бўйича вилоят матбуот маркази.