Самарқанд шаҳридаги Яккакураш спорт турларига ихтисослаштирилган болалар-ўсмирлар спорт мактабида
2004-2005 йилларда туғилган ёшлар ўртасида юнон-рум ва эркин кураши бўйича “Ўзбекистон кубоги” жамоавий беллашувлари ташкил этилмоқда.

Дастлаб юнон-рум кураши бўйича беллашувлар ўтказилди. Қорақалпоғистон Республикаси, Тошкент шаҳри ва барча вилоятлар жамоалари иштирок этган мусобақада полвонлар ўн вазн тоифасида гилам чиқишди. 38, 41, 44, 48, 52, 57, 62, 68, 75, 85 килограмм вазн тоифаларида ўтказилган беллашувларнинг якуний финал баҳсида мезбон — Самарқанд вилояти жамоаси бухорлик полвонларга қарши гиламга чиқишди. Муросасиз кечган финал баҳсида самарқандлик ёшлар рақибларини 7:3 ҳисобида мағлуб этиб, “Ўзбекистон кубоги” соҳиби бўлишди. Мусобақада учинчи ўринни Тошкент вилояти жамоаси қўлга киритди. Улар фарғоналик полвонларни 7:3 ҳисобида мағлуб этишди.

Мусобақа ғолиб ва совриндорлари ташкилотчилар томонидан диплом, медаль ва эсдалик совғалари  билан тақдирланишди.

12-13 март кунлари эркин кураш бўйича “Ўзбекистон кубоги” баҳслари ўтказилади.