1-2 август кунлари Тошкент шаҳридаги “Самарқанд дарвоза” савдо мажмуасида бўлиб ўтган қўли гул уста-ҳунармандлар ва тадбиркорлар иштирокидаги кўргазма-савдо ярмаркасида Самарқанд ва Бухоро усталарининг зардўзи ва патдўзи услубидаги либос ҳамда уй-рўзғор буюмлари намойиш этилди. 

* * *

Инвестиция дастури ижросига кўра, Нарпай туманидаги Хўжақўрғон, Ёвузхўр, Янгиработ, Оқота ҳамда Башандоқ қишлоқларида янги сув миноралари бунёд этилиб, ҳудуд аҳолиси тоза ичимлик сув билан таъминланди.

 * * *

1 августдан бошлаб Андижон шаҳри кўчаларида Самарқандда ишлаб чиқарилган 20 та “Isuzu” автобуслари пайдо бўлди. Кейинчалик яна 120 автобус турли йўналишлар бўйича йўловчиларга хизмат кўрсата бошлайди.

* * * 

Япониянинг нуфузли «The Sekai Nippo» газетаси журналист Сусуми Фуджихашининг “Самарқанд: гўзал ва улуғвор Шоҳи Зинда” суратли мақоласини эълон қилди. Унда шаҳар тарихи, ундаги қадимий осори-атиқалар ҳақида батафсил маълумот берилган.

* * *

Булунғурдаги “Гўзал ФТХ” хусусий фирмаси раҳбари Ф.Равшанов тумандаги агросаноат ва сервис касб-ҳунар коллежи битирувчиларидан 12 нафарини иш билан таъминлади.

Дилмурод Тўхтаев тайёрлади