Самарқандда 21-22 июнь кунлари “Ўзбекистондаги қўлёзма фондлари: муҳофаза қилиш, каталоглаштириш ва мутахассислар малакасини ошириш” мавзусида илмий-амалий ўқув семинари ўтказилди.

Ислом ҳамкорлик ташкилоти (OIS)нинг Ислом тарихи, санъати ва маданиятини тадқиқ қилиш Маркази (IRCICA) билан ҳамкорликда Имом Бухорий халқаро илмий-тадқиқот марказида ташкил этилган мазкур тадбирда Самарқанддаги кутубхонада сақланаётган нодир асарлар мазмун-моҳиятини халқимизга етказиш мақсадида уларни саралаш ва босқичма-босқич таржима қилиш  масалалари муҳокама этилди.

Кўргазма давомида IRCICA директори Холит Эрен томонидан “Саҳиҳ ал-Бухорий” асарининг XI асрга оид қўлёзмаси фото нусхаси ҳамда Султон Абдулҳамид томонидан XIX асрда тайёрланган Муқаддас Каъба ва унинг ҳудуди акс этган китоб альбоми Имом Бухорий халқаро илмий-тадқиқот марказига туҳфа қилинди. 

Шунингдек, тадбир давомида Халқаро ислом хаттотлиги кўргазмаси ҳам ташкил қилиниб, унда қатнашчилар марказ музейи ва тарихий қўлёзмалар фондида ҳамда хаттотлар томонидан сақланаётган ноёб тарихий асарлар билан танишишди.