Самарқанд вилояти ҳокимлиги w w w . s a m a r k a n d . u z

Оқ пахтани алдаб бўлмайди

Оқ пахтани алдаб бўлмайди

Бугун эрталаб Бош вазиримиз Абдулла Арипов олиб борган пахтани ёғин-сочин кунларга қолмай йиғиб-териб олишга бағишланган фавқулодда йиғилишда иштирок этдик.

Очиғи, йиғилишда айтилган гапларни тинглаб, суяги пахта далаларида қотган ва соҳада кўп йиллик тажрибага эга деҳқон-фермер сифатида бир жиҳатдан, уятдан юзимизқизарди, иккинчи жиҳатдан,бундай қинғирликларни фош этган Президентимизга раҳмат айтдик.

Гарчи қишлоқ хўжалиги тизимида амалга оширилаётган ислоҳотлар ва уларнинг самаралари натижасида пахта етиштиришда деҳқон улкан имкониятларга эга бўлган, пахтадан олинадиган даромад мамлакатимиз, халқимиз, айниқса, фермерлар, қишлоқ хўжалиги соҳаси ходимлари учун нақадар катта иқтисодий фойда келтираётган бўлса-да, айрим жойларда қўшиб ёзишлар, сохта маълумотлар бериш ҳолатлари ҳамон борлиги маълум бўлди.

Еримиз баракали. Унда нафақат пахта битади, балки мамлакат таянчи, иқтисодиёт суянчи, элнинг ризқи, насибаси юз очади. Шунинг учун ҳам пахта ўзбекка бағоят азиз.

Ерга чигит тушган кун байрам қилиниши, ғўза униб чиққан дақиқадан бошлаб деҳқон ҳаловатини йўқотиши ҳам шундан. Ғўзаси гуллаганда деҳқоннинг қувончи-ю пахта очилган дақиқадаги севинчини англамоқ учун юрагинг оқ пахтадай беғубор бўлмоғи керак. Деҳқон қалби ҳам пахтасидек оқ. Шундан унинг йўли равон, манзили нурли.

Бир вақтлар пахта етиштириб, уни сув текинга бировларга қўшқўллаб тутқазиб, тағин таъна-маломатларга қолган деҳқоннинг бугун қадди тик. У ер-у мулкка соҳиблиги, ҳалол меҳнати, тадбиркорлиги, сифатли маҳсулоти билан бозорини забт этмоқда. Даромади йилдан-йилга ортмоқда. Бу пахтанинг кетидан, пахтанинг баракасидан.

Пахта ўзбекнинг боласига йўргакдан теккан мерос. Аллаларимиз, эртакларимиз пахта билан боғланган. Фақат, маълум вақт пахтани инсондан ортиқ деб яшадик...

Ҳали эсимиздан чиққани йўқ. Ўтган асрнинг олтмишинчи-саксонинчи йилларда пахта йиғим-терими уч-тўрт ойга чўзиларди. Декабрь ойларида ҳам кўсак (кўрак) теравериб, қўллари тарс-тарс ёрилган, чаноқлар тирноқларини кесиб юборган совуқ изғиринлар юзларига тўр ташлаган аёлларимизни эсласакҳалигача этимиз увишади.

Бугунчи? Бугуннинг деҳқони, фермери чигитни танлаб, саралаб, тезпишарини экяпти. Пахта қийғос очилгач, бир-бир ярим ойдаёқ терим поёнига етаяпти.

Халқимизда “Оқлик-поклик”, деган нақл бор. Қолаверса, оқ йўл, оқ ният тилаш бизда азалий удум. Шу боисдан пахтага алоҳида меҳр қўйганмиз. Шу боисдан чигитни заминга қадашдан олдин қурбонлик сўйиб, оқ ният қиламиз.

Асл деҳқон ҳар тун ғўзасини фарзандидай эркалайди. Бир тўп ғўза лат еса ҳам дили ачишади. Айниқса, шундай пайтлар бўлдики, деҳқончиликдан хабари йўқ олғирлар фермер бўлиб олиб, ишламасдан, минерал ўғитларни сотиб, бировнинг ҳисобидан ёки кўзбўямачилик билан режани тўлдириб, давраларнинг тўрида ўтиришди. Ўшандай пайтда умрини ерга бағишлаган бизга ўхшаган деҳқонларга нечоғлик алам қилганини ёлғиз ўзимиз биламиз.

Шукрким, Президентимиз соҳани тубдан ислоҳ қилишни бошлади. Хусусан, пахтачиликдаги иқтисодий муносабатлар такомиллаштирилди. Қўшимча даромадга имкон яратилди.

Ана шундай пайтда ҳам кўзбўямачилик, қўшиб ёзишга йўл қўяётганлар халқимизнинг ҳалоллик каби қадриятини топтаган кимсалардир.

Пахтакорга бу йил Худо берди. Ҳосил фақат бизда эмас, барча туманларда, вилоятларда мўл ва сифатли бўлди. Бутун эл ёрдамга келаяпти. Теримга ҳақ тўлашнинг кундалик тизими яратилди. Тарози жойлари ва пахта заводларида жамоатчилик назорати, электрон кузатувлар йўлга қўйилди. Айтингчи, бу шароитда қўшиб ёзишга эҳтиёж бормиди?

Пахта режасини бажариш бу мусобақа, шон-шуҳрат эмас. Унинг замирида қишлоқ аҳлининг, қолаверса, бутун давлатнинг даромади, фаровонликнинг манбаи турибди.

Ҳосилни увол қилиш, режа ижросига қўшиб ёзиш ўз оёғига болта уриш билан баробар. Биз бундай ножўя ҳаракатни қаттиқ қоралаймиз ва ҳамкасбларимизни бу хил нопокликка йўл қўймасликка чорлаймиз.

Зайнаб ҲАЙДАРОВА,

Нарпай туманидаги “Меҳнат роҳат” фермер хўжалиги бошлиғи.

Содиқ ҲАҚБЕРДИЕВ,

Нарпай туманидаги “Пахтакор” фермер хўжалиги бошлиғи.

Тоштемир ҲАЙИТОВ,

Каттақўрғон туманидаги Жума Ҳайитов номли муқобил МТП раиси.

Элибой ТАНИЕВ,

Паст Дарғом туманидаги “Имсим момо” фермер хўжалиги бошлиғи.

Яхшибой ҲАСАНОВ,

Иштихон туманидаги “Асалчи Элдор” фермер хўжалиги бошлиғи.


Охирги ўзгариш: 30/10/2017 18:18.   Кўрилганлиги: 418
 
Материал манзили: https://samarkand.uz/press/news/oq-paxtani-aldab-bolmaydi

 

Сўровнома


Веб-сайтимиз орқали қайси соҳа бўйича кўпроқ янгиликлар жойлаштирилишини истайсиз?

Хабарларга обуна бўлиш


Статистика


Ҳозир онлайн
Рўйхатдан ўтганлар: 2
Меҳмонлар: 4

Яндекс.Метрика

Ҳаракатлар стратегияси 2017-2021

 

Copyright © 2010 – 2018. Самарқанд вилояти ҳокимлиги. Сайт материалларидан фойдаланганда www.samarkand.uz манбаи кўрсатилиши шарт.

 
Ўқиш учун ушбу тугмани босинг