Бухорода ўтказилган “Нақшбанд туризм фестивали – 2018” халқаро тадбири иштирокчилари Самарқандга ташриф буюрди.

Малайзия, Индонезия, Туркия, Буюк Британия, Янги Зеландия, Хитой, Ҳиндистон, Австралия сингари 15 мамлакатдан келган Нақшбандия сўфийлари тариқатининг 170 дан ортиқ вакилларини Пайариқ туманидаги Имом Бухорий мажмуасида вилоят ҳокимининг ўринбосари Ш.Қулматов, Ўзбекистон мусулмонлар идораси вилоят вакиллиги ходимлари кутиб олди.

– Ўзбекистон заминида туғилиб ўсган, ислом ва жаҳон илм-фани ривожига беқиёс ҳисса қўшган буюк мутафаккирларни бутун дунёда яхши билишади, – дейди доктор Муҳаммад Ражаб Ден. – Мусулмон оламидаги машҳур алломалар, нақшбандия тариқати асосчилари ҳам шу заминда яшаб ўтган. Шундай юртни зиёрат қилиш бизнинг орзуимиз эди ва бунга эришганимиздан мамнунмиз. Шунингдек, меҳмонлар Самарқанд туманидаги Хўжа Аҳрори Вали қадамжоси, Самарқанд шаҳридаги Шоҳи Зинда мажмуасида ҳам бўлишди.

Бахтиёр МУСТАНОВ.