Самарқанд шаҳрида шу шиор остида аскарлар ҳамда уларнинг оила аъзолари, дўстлари ўртасида видеомулоқот уюштирилди. 

Унда Самарқандда ҳарбий хизматни ўтаётган хоразмлик ўғлонлар ва Хоразмда хизмат қилаётган самарқандлик йигитлар, уларнинг ота-оналари ва дўстлари қатнашди.

Тадбир аввалида вилоят ҳокимининг ўринбосари А.Умаров, Ўзбекистон ёшлар иттифоқи вилоят кенгаши раиси Р.Қобилов Ватан ҳимоячиларини байрам билан қутлаб, ватанпарвар фарзандларни тарбиялаган ота-оналарга миннатдорлик билдирди. Шундан сўнг дийдорлашув онлари бошланди.

- Ўғлимдан ёшлигида “Катта бўлсанг ким бўласан?”, деб сўрашса, “Аскар бўламан!”, дея жавоб берарди, - дейди Хоразм вилоятида харбий хизматни ўтаётган оддий аскар Комилжон Рустамовнинг онаси пайариқлик Шаҳноза Норова. – У билан телефон орқали суҳбатлашиб турардим. Бугун ўғлимни аскарлар орасида кўриб, хурсанд бўлдим.

Шундай имкониятлар яратилиб, мулоқотлар ташкил этилаётганидан хурсандмиз.

-  Ота-онам ва дўстларим билан видеомулоқот орқали суҳбатлашиб, уларни ёнимда тургандай ҳис қилдим, - дейди Самарқандда йигитлик бурчини ўтаётган хоразмлик Қувондиқ Панаев. – Аскарлик кийими – йигит кишининг кўрки. Ватанни ҳимоя қилиш эса шараф. Келажакда мен олий ҳарбий таълим муассасасига ўқишга кириб, офицер бўлмоқчиман.

Хоразмлик ҳамда самарқандлик хушовоз хонандалар ижросидаги куй-қўшиқлар иштирокчиларга байрамона кайфият бағишлади.

Олим Соннибоев.