Юрт байроғи. Шу биргина сўз замирида бутун бир миллат тақдири акс этган.

Шунинг учун ҳам байроқ деганда, кўз ўнгимизда мамлакатимиз  озодлиги, тинчлиги, фаровонлиги йўлидаги ҳаракатлар, халқимизнинг орзу-истаклари ва  неча минг йиллик тарихимизнинг саҳифалари намоён бўлади.

Турли тантаналару, байрамларда, мусобақаларда, жаҳон ареналарида осмон узра юртимиз байроғи кўтарилганда ҳар бир ўзбекистонликнинг кўкси ифтихор туйғуси билан тўлади.

Бугун Каттақўрғоннинг Эски шаҳар ҳудудида баландлиги 62 метр бўлган Ўзбекистон Республикасининг Давлат байроғи ўрнатилди. Шу муносабат билан ташкил қилинган тадбирга Каттақўрғон шаҳар аҳолиси, идора ва ташкилотлар, жамоат ташкилотлари вакиллари ҳамда кенг жамоатчилик иштирок этди.

Тадбирда сўзга чиққанлар барчани Мустақиллигимизнинг 28 йиллиги байрами билан қутлаб, мустақиллигимиз рамзи бўлган Давлат байроғининг мамлакат ҳаётида тутган ўрни, миллатимиз шаъни ва ғурурини ифода этишдаги аҳамияти ва юрт тараққиёти, келажаги йўлидаги улуғворлиги хусусида сўз юритишди.