Самарқанд шаҳрида “Silk Road Bazaar” (“Ипак йўли бозори”) миллий ҳунармандчилик ва савдо фестивали бошланди.

Фестивалда Самарқанд, Фарғона ва Қашқадарё вилоятлари ҳамда Тошкент шаҳридан келган 80 нафардан зиёдроқ уста-ҳунармандлар ўз маҳсулотлари билан иштирок этмоқда.

Маҳобатли Регистондан бошланадиган мазкур фестивалда Самарқанд кашталари, Тошкент чиннилари, Фарғона адрасию Шаҳрисабзнинг чопонлари ва нимчаларини томоша қилишингиз мумкин.

Шунингдек, кулолчилик, гиламдўзлик, заргарлик, ёғоч ўймакорлиги, сангтарошлик, каштадўзлик, зардўзлик, наққошлик, читгарлик сингари ҳунармандлик маҳсулотлари, элликдан ортиқ турдаги Самарқанд нонлари  ҳар қандай кишининг ҳайратини оширади.

Фольклор-этнографик жамоаларнинг чиқишлари, саҳналаштирилган томошалар ва концерт дастурлари иштирокчиларда катта таассурот қолдирди.

Шунингдек, сайилда қандолат маҳсулотлари, полиз экинлари ярмаркаси ҳам ташкил этилди.

Фестиваль 26 августга қадар давом этади.

ҲОКИМЛИК АХБОРОТ ХИЗМАТИ