Бугун, 28 июнь куни Ургут туманидаги “Чорчинор” оромгоҳида “Ҳоким ва ёшлар” учрашуви ўтказилди.

Даставвал учрашувга келган ёшларга вилоятда амалга оширилаётган бунёдкорлик ишлари ва келгусидаги режалар ҳақида маълумот берилди.

50 нафардан ортиқ йигит-қизлар ўзларини қийнаётган муаммо ва таклифлар бўйича вилоят ҳокимига мурожаат қилишди. Муаммоларнинг аксариятига шу жойнинг ўзида ечим топилди. Жумладан, тумандаги 34-умумий ўрта таълим мактаби ўқувчиси Азиза Раҳмонова ўзи таҳсил олаётган мактаб спорт зали спорт инвентарлари билан таъминланмаганини айтиб, ёрдам сўради. Шунингдек, Ўзбекистон ёшлар иттифоқи туман бўлимининг фаол қизларидан бири Фарангиз Маҳмадаминова туман ёшлари учун автобус сўраб мурожаат йўллади.

Учрашувда ёшлар томонидан билдирилган барча мурожаатларга бир ҳафталик муддат билан масъуллар бириктирилиб, ижроси вилоят ҳокимлиги ва ёшлар иттифоқи вилоят кенгаши томонидан назоратга олинди.